Мило ми е,

Јас сум Ева, но моите две мачки ме нарекуваат „мјау“. Доаѓам од Полска, но изгледа не оставам таков впечаток, бидејќи сум „премногу весела“ – барем така ми викаат. Сакам јапонски јазик, мачки, а особено јапонски мачки. Имам 23 години и студирам лингвистика.

Моето главно хоби е стекнување нови искуства и ставање на себеси во предизвикувачки, помалку непријатни ситуации, бидејќи верувам дека соочувањето со стравовите ја зајакнува самодовербата. Уште од најмала возраст уживам во цртањето и пеењето. Сакам калиграфија и прошетки, бидејќи тоа ме смирува. Сакам да одгледувам и да јадам домати, а мојот сон е да ја посетам Шпанија за време на фестивалот „La Tomatina“.

Во зависност од расположението, слушам Томас Њуман, „Тул“ (Tool) или „диско поло“. Секогаш сум расположена за караоке и за секаков вид бесплатни настани.

Фасцинирана сум од животот во Македонија и со нетрпение очекувам да дознаам повеќе за земјата, да запознаам нови луѓе и да пробам шопска салата. Кога станува збор за ИТ вештините, не сум баш некој експерт, па токму тоа би сакала да го подобрам преку овој волонтерски проект. Ви благодарам.

Ева