Во мигот кога една мајка ќе ми го подаде своето бебе, таа веќе ја носи во себе тивката, но непоколеблива сила на жена оформена од љубов, одговорност и надеж. Некои животни патувања се исцртани на мапи, а други тивко се бележат во графиконите за раст и развој, во вредностите на хемоглобинот и во тежината на едно бебе што мирно почива во раце.

Постои суптилен, но длабоко значаен облик на општествен придонес што произлегува од средини во кои грижата се обезбедува континуирано, внимателно и без очекување на возврат. Токму ова го искусив одблиску за време на моето волонтирање во невладината организација CHEERing во Атина, посветена на обезбедување превентивна здравствена грижа за заедници и семејства баратели на азил сместени во бегалските кампови.

Меѓу вообичаените активности „Grow“ клиниките имаат посебно значење за мене. Преку нив обезбедуваме поддршка за мајки, бебиња и мали деца кои живеат во бегалските кампови и засолништа низ пошироката област на Атина.

Секоја недела, работата во клиниките следи едноставен, но исклучително значаен ритам. Ги мериме бебињата, ја утврдуваме нивната должина и внимателно го следиме нивниот раст и развој со текот на времето. Овие редовни прегледи овозможуваат рано препознавање на потенцијални здравствени состојби и им даваат на семејствата поддршка, практични совети и навремени упатувања кон соодветни институции кога тоа е потребно. За многу родители, овие средби се и простор каде што можат да постават прашања, да ги споделат своите грижи и да почувствуваат дека некој навистина ги слуша и се грижи.

Поддршката и унапредувањето на доењето претставуваат клучен сегмент од работата на „Grow“ клиниките. Благодарение на знаењето и насоките од нашите советници за доење, им помагаме на мајките да стекнат сигурност, да добијат точни информации и одговори на нивните дилеми, охрабрувајќи ги во практикувањето на доењето. Истовремено, големо внимание се посветува и на основната превентивна грижа. Спроведуваме скрининг за анемија со цел рано препознавање и справување со честиот недостаток на железо кај жените, како и програма за витаминска суплементација во соработка со Глобалната здравствена организација Vitamin Angels, која обезбедува високи дози витамин А и третман против цревни паразити за деца под петгодишна возраст.

Сите активности во рамките на „Grow“ клиниките се реализираат во согласност со препораките на Светската здравствена организација, обезбедувајќи конзистентна, безбедна и меѓународно усогласена здравствена грижа. Она што ги прави овие клиники навистина ефикасни е нивната доследност. Мали и едноставни алатки како графикони за раст, витаминска суплементација и редовни прегледи прераснуваат во моќни алатки за континуирано следење и унапредување на здравјето.

Волонтирањето со CHEERing за мене претставуваше длабоко значајно искуство. Одблиску да се види како мали совети, внимание и поддршка можат да направат вистинска разлика во животите на децата и семејствата остава траен впечаток. Ова искуство беше јасен потсетник дека пристапот до здравствена грижа и релевантни информации е основно човеково право и дека дури и малите, но постојани напори можат да резултираат со долгорочни и значајни промени.

Ваквите искуства се силен пример за важноста на личниот ангажман во општествените прашања. Волонтирањето преку програмите на European Solidarity Corps нуди можност за учење, работа во мотивиран и посветен тим и чувство дека си дел од нешто поголемо. Нешто што нè обединува и нè поттикнува да покажеме грижа едни за други.

Навистина ќе ми недостига времето поминато во Атина: тесните, светли улици и плоштади, шарените пазари полни со свежи производи, мирисот на кафе и свежо печени пецива што се шири низ утринскиот воздух, живиот џагор во малите кафулиња зад секој агол, викендите поминати во истражување на историските знаменитости и чувството дека градот живее во секој миг од денот. Но, најмногу од сè ќе ми недостигаат луѓето со кои имав чест да работам и од кои секојдневно учев. Се надевам дека нашите патишта повторно ќе се сретнат во иднина.

Сара Николова